Faisnéis eagraíochta
Tuarascáil maidir le Dualgas na hEarnála Poiblí 2024
Foilsithe
An t-eolas is déanaí
Foilsithe
An t-eolas is déanaí
Tá ár gCoiste um Dhualgas na hEarnála Poiblí (PSD) comhdhéanta d’ionadaithe ó gach réimse dár nOifig. Cuirtear príomh-cheisteanna agus imeachtaí a bhaineann le Cearta an Duine agus Comhionannas i dtabhácht ar ár leathanach inlín don fhoireann PSD agus déanann ár gCoiste PSD imeachtaí a phleanáil chun imeachtaí agus laethanta áirithe a bhaineann le Cearta Daonna agus Comhionannas a chomóradh.
Ag teacht lenár bPlean Gníomhaíochta PSD, bhí tabhairt isteach Cur Chuige Bunaithe ar Chearta an Duine (HRBA) maidir le gearáin á láimhseáil ag an Ombudsman ar cheann de phríomhchuspóirí ár Ráiteas Straitéise. Ba é an príomhchuspóir a bhí leis an gcur chuige seo a ghlacadh ná a chinntiú go dtugann Soláthróirí Seirbhíse Poiblí atá faoinár réimse freagrachta aird ar chearta daonna na ndaoine aonair a ndéileálann siad leo gach lá agus go ndéanann an tOmbudsman breithniú ar cibé an dtugann an SSI lena mbaineann aird chuí ar chearta an duine aonair/na ndaoine sin nó ar chearta an teaghlaigh sin mar chuid dár n-imscrúdú ar a ngearán.
Le linn 2023 rinneamar dul chun cinn suntasach maidir leis an gcuspóir seo trí oiliúint maidir le Cearta an Duine a chur ar fáil dár bhfoireann. Rinneamar dul chun cinn maidir lenár gcuspóir in 2024 trí threoir chuimsitheach a chur le chéile agus a sheoladh dár bhfoireann chun cabhrú leo gníomhartha agus cinntí comhlachtaí poiblí a mheas, ó thaobh cearta daonna de. Tá fáil ar ár dTreoir Foirne sa Rannán PSD den leathanach 'Straitéis & Rialachas ' ar ár suíomh Gréasáin.
Le linn 2024 rinne an Oifig athbhreithniú ar éifeachtacht agus ar raon feidhme ár gclár reatha don Idirbhliain. Ag teacht lenár spriocanna PSD, leagadh béim ar chlár a fhorbairt lena gcuirfí le rochtain agus le hionadaíocht i measc scoláirí ó chúlraí faoi mhíbhuntáiste. Rinne an Oifig teagmháil le Clár Rochtana Choláiste na Tríonóide (TAP), a bhfuil sé mar aidhm aige rochtain agus rannpháirtíocht ag an tríú leibhéal a leathnú do ghrúpaí tearcionadaithe. Reáchtálann TAP clár Idirbhliana le rannpháirtithe ó 21 scoil, ar scoileanna DEIS 17 díobh agus is scoileanna iad an 4 scoil eile atá i gceantair atá aitheanta mar cheantair a bhfuil rátaí ísle maidir le dul ar aghaidh chuig ardoideachas acu.
D’fhéachamar ar Chláir Idirthréimhseacha i Ranna Rialtais eile agus in Oifigí Ombudsman chun a fháil amach conas a d’fhéadfaí ár gclár Idirbhliana reatha a fheabhsú chun gníomhaíochtaí níos tarraingtí agus níos idirghníomhaí a sholáthar, agus ar an gcaoi sin eispéireas níos tairbhí a thabhairt do scoláirí. Chuireamar grúpa trasoifige le chéile chun freagracht a ghlacadh as an gclár athbhreithnithe a fhorbairt agus a sheachadadh. Chuir TAP comhairle agus treoir ar fáil freisin maidir le ceardlanna a eagrú agus a phleanáil do scoláirí.
I mí Feabhra 2025, ghlac 11 scoláire páirt i gClár athbhreithnithe Idirbhliana Oifig an Ombudsman. Bhí cúigear orthu sin muinteartha do bhaill foirne inár n-oifig agus d’fhreastail seisear ó scoileanna DEIS tríd an gclár TAP. In ionad an chláir bunaithe ar chur i láthair roimhe seo, ghlac scoláirí páirt i sraith seisiún maidir le scileanna san ionad oibre a raibh sé mar aidhm leo príomhscileanna boga a fhorbairt ó chreat inniúlachta na státseirbhíse ar nós anailís agus cumarsáid scríofa, cumarsáid ó bhéal, obair foirne, etc. Díríodh i ngach seisiún ar obair chomhlachta nó rannóige reachtúil eile inár n-oifig agus rinne siad iniúchadh ar roinnt de na saincheisteanna práinneacha polaitiúla agus sóisialta atá roimh Éirinn faoi láthair.
Creidimid gur bhealach éifeachtach a bheidh sa chlár athbhreithnithe don Idirbhliain ina chun feasacht a spreagadh i measc pobail faoi mhíbhuntáiste faoinár nOifig agus na bealaí éagsúla inar féidir leis cabhrú leis na pobail sin. Cabhróidh sé seo lenár gcuspóir straitéiseach a bhaint amach maidir le caidreamh a chothú le pobail faoi mhíbhuntáiste agus ag an am céanna ár gcuspóirí PSD a chothú.
Ceann de na príomhchuspóirí i bPlean Gníomhaíochta an Choiste PSD is ea bearta a shainaithint a d’fhéadfadh cabhrú linn grúpaí den phobal a shainaithint ar grúpaí iad nach bhfuilimid ag dul i bhfeidhm orthu anois. In 2023 d’fhorbraíomar roinnt moltaí maidir le conas a d’fhéadfadh an Oifig sonraí pearsanta a bhailiú ó dhaoine a chuir gearáin faoi bhráid an Ombudsman d’fhonn a fháil amach cé na daoine atá ag déanamh gearáin leis an Ombudsman agus, cé na daoine nach bhfuil ar an eolas seans faoinár seirbhís. In 2024, sheol an Oifig a suirbhé déimeagrafach. Tá an suirbhé deonach agus ní gá d'ainm a thabhairt leis agus déantar é a chur i gcomparáid leis an Daonáireamh Náisiúnta chun gur féidir linn comparáid lánbhrí a dhéanamh leis an daonra náisiúnta agus ag teacht lenár ngealltanais PSD cabhraíonn sé linn a chinntiú go bhfuil ár bhfeachtais faisnéise dírithe ar ghrúpaí atá ‘tearcionadaíoch’ agus/nó ar deacair dul i dteagmháil leo.
I rith 2024, d’eagraíomar cur i láthair suimiúla agus ábhartha dár bhfoireann ar Lá Idirnáisiúnta na mBan, Lá na hEorpa agus an Lá Domhanda um Chosc ar Fhéinmharú. Bhí roinnt imeachtaí ar siúl againn freisin maidir le Bród na nAerach (Meitheamh) agus Seachtain Feasachta na mBodhar (Meán Fómhair).
Tá áthas ar PSD a thuairisciú gur chinn Coimisiún na hÉireann um Chearta an Duine agus Comhionannas go gcomhlíonann gach ceann de na sé chomhlacht reachtúil inár nOifig Alt 42 den Acht fá Choimisiún na hÉireann um Chearta an Duine agus Comhionannas go hiomlán, sa mhéid is go raibh plean PSD curtha le chéile againn agus go ndearna muid tuairisciú maidir leis an dul chun cinn i ngach ceann dár dtuarascálacha. bliantúla.